ភ្នំពេញ ៖ រដ្ឋបាលរាជធានីភ្នំពេញ នៅថ្ងៃទី០៥ ខែឧសភា ឆ្នាំ២០២១ បានចេញសេចក្ដីជូនដំណឹងដល់ម្ចាស់ក្រុមហ៊ុន និងម្ចាស់អាជីវកម្មទាំងអស់ដែលធ្លាប់បានទទួលលិខិតអនុញ្ញាតធ្វើដំណើរ ឬធ្វើចរាចរណ៍ពីរដ្ឋបាលរាជធានីភ្នំពេញ និងរដ្ឋបាលខណ្ឌទាំង១៤ ក្នុងនាមគណៈកម្មការប្រតិបត្តិនៃគ.ប.ខ ជ្រាបថា លិខិតអនុញ្ញាតធ្វើដំណើរ ឬធ្វើចរាចរណ៍ដែលម្ចាស់ក្រុមហ៊ុន និងម្ចាស់អាជីវកម្មទាំងអស់ដែលធ្លាប់បានទទួលលិខិតអនុញ្ញាតធ្វើដំណើរ ឬធ្វើចរាចរណ៍ពីរដ្ឋបាលរាជធានីភ្នំពេញ និងរដ្ឋបាលខណ្ឌទាំង១៤ ក្នុងនាមគណៈកម្មការប្រតិបត្តិនៃគ.ប.ខ នោះត្រូវអស់សុពលភាពប្រើប្រាស់ចាប់ពីថ្ងៃទី០៦ ខែឧសភា ឆ្នាំ២០២១។ 

រដ្ឋបាលរាជធានីភ្នំពេញ ណែនាំម្ចាស់ក្រុមហ៊ុន និងម្ចាស់អាជីវកម្មទាំងអស់ដែលត្រូវការចាំបាច់ស្នើសុំលិខិតអនុញ្ញាតធ្វើដំណើរ ឬធ្វើចរាចរណ៍ឆ្លងកាត់ “តំបន់លឿងទុំ” និង “តំបន់ក្រហម” ដាក់ពាក្យស្នើសុំនៅរដ្ឋបាលរាជធានីភ្នំពេញ និងរដ្ឋបាលខណ្ឌទាំង១៤ ចាប់ពីថ្ងៃទី០៦ ខែឧសភា ឆ្នាំ២០២១ នេះតទៅ។

រដ្ឋបាលរាជធានីភ្នំពេញ ថាការធ្វើបែបនេះគឺដើម្បីធានាស្ថិរភាពនៅក្នុងការដំណើរការប្រក្រតីផ្នែកសង្គម និងសេដ្ឋកិច្ច ក៏ដូចជាដើម្បីពង្រឹងការអនុវត្តវិធានការប្រយុទ្ធការឆ្លងរាលដាលជំងឺកូវីដ-១៩ និងកាត់ផ្តាច់ចរន្តនៃការឆ្លងរាលដាលនៃជំងឺដ៏សាហាវនេះទៅតំបន់ផ្សេងទៀត៕